التقي team onlineبالفنان يوسف الشريف بمناسبة فيلمه القادم العالمي والذي يخص بجزء كبير كرة القدم ويحكي الفيلم قصه الفيلم عن حياة لاعب كره قدم الخاصه وكان لنا هذا الحوار مع) من هو يوسف الشريف ؟
يوسف الشريف من مواليد 14/9/1978 الحالة الاجتماعية أعزب وفي البداية بدأت حياتي لاعب كره قدم لمده 6 سنوات منهم ثلاث سنوات بالنادي الأهلي ومن قبله نادي الجلاء وتدربت علي يد كابتن إبراهيم عبد الصمد وكابتن محمد عامر وبعد ذلك تركني النادي الأهلي ومن بعدها قررت اعتزال كره القدم رغم وجود أكثر من فرصه في أكثر من نادي ولكن بكل صراحة " يا الأهلي يا بلاش " ووقتها أنتهي هذا الحلم ولكني مازلت مهتم بالكره وتقريبا كل أصدقائي لاعبين كره قدم أكثر من الممثلين . وبصراحة أنا أهلاوي وبحب النادي الأهلي والنادي الأهلي ده كيان مهم في مصر وتعتز به .
أما بالنسبة لمشوار التمثيل فمازلت في البداية من سنه 2004 بعدما أنتهيت من الدراسه انا خريج هندسه جامعه عين شمس قسم ميكانيكا سنه 2002 وخلال فتره الدراسه عملت أكثر من اعلان مع الدكتور شريف صبري وجايز يكون هذا هو السبب في دخولي لمجال التمثيل بالصدفه البحته وكان وقتها يحضر لفيلم 7 ورقات كوتشينه مع روبي وأقترح عليه المشاركه في الفيلم وكانت هذه المره اول مره امثل فيها والحقيقه يمكن يكون الفيلم لم ينجح النجاح المنتظر وكان بالنسبه لي خطوه كويسه بتعرف بيها علي الناس والحمد لله قبول الناس ليا كان بشكل معقول جدا سواء مع المنتجين او مع الجمهور وذلك جعلني أخد خطوه ثانيه في فيلم فتح عنيك مع مصطفي شعبان ونيللي كريم .
2) ما هي أعمالك الفنيه ؟
في السينما أفلام 7 ورقات كوتشينه وفتح عنيك وأخر الدنيا وهي فوضه وضيف شرف في فيلم حليم ( كنت بدور فرد من الشعب المصري واتأثر بعبد الحليم حافظ ) .أما بالنسبه للتلفزيون فمسلسل العميل 1001 وعلي نار هاديه والسندريلا .و حاليا بنصور فيلم العالمي
3) كلمنا عن فيلم العالمي .
فيلم العالمي هو أول فيلم في تاريخ السينما المصريه "يتعمل " بشكل أحترافي عن كره القدم فهو عن كره القدم فعلا وليس أن الكره موجوده للدعايا وقصه حياته هو لاعب كره قدم واخراج أحمد مدحت وانتاج وسيناريو محمد حفظي وبطوله الأستاذ صلاح عبد الله والاستاذه دلال عبد العزيز ومحمد الشقنقيري ومحمد لطفي واروا جوده ووجه جديد اسمها رحمه والفيلم به عدد من لاعبي كره القدم . قصه الفيلم الفيلم تدور أحداثه من سنه 1990 لسنه 2009 وقصته بتتكلم عن حياة لعيب كره قدم بجد ومقدمنها بشكل جديد وحقيقيه جدا والنادي الأهلي له نصيب كبير جدا في الفيلم وقصه اللاعب انه يبدء بأحد أنديه الدرجه الثانيه وخلال الفيلم بتحدث أحداث دراميه خلال الفيلم تجعله يعتزل اللعب وبعدها يعود مره ثانيه ولكن بروح مختلفه تماما ومن هنا ينتقل للنادي الأهلي وبتبقي ناقله كبيره جدا في حياته بعدما تحاول كل أنديه مصر الكبيره الحصول علي امضاءه وهو بيختار النادي الأهلي وينتقل للنادي الأهلي وبظهور كل نجوم الفريق ومن بعدها يحترف لأحد أكبر الأنديه الاسبانيه وبينضم لمنتخب مصر والحقيقه الموضوع أكبر بكثير من كل هذا الكلام ولكني لن استطيع قول كل شئ والفيلم به روح النادي الأهلي وروح منتخب مصر وروح الفوز والحمد لله صورنا جزء كبير جدا من الفيلم حوالي 95 % وينقصنا 4 أيام بمصر ( 3 ايام باستاد القاهره ويوم واحد بالنادي الأهلي ) و3 أيام بأسبانيا والفيلم هيظهر به نجوم عالميين وان شاء الله هيكونوا مفاجئه لكل الناس .
4) مترددتش في خوض تجربه الفيلم رغم أن عدد كبير من الأفلام التي كانت تعتمد علي كره القدم لم تلقي النجاح الكبير بين الجماهير ؟
بصرف النظر عن كره قدم بعد فيلم هي فوضي حياتي الفنيه تغيرت تماما وفقدت روح المغامره ومن خلال هذا الفيلم بدأت نظره الناس تختلف تماما وبالعكس تماما أنا ترددت في اكثر من فيلم ولكن هذا الفيلم لم اتردد تماما وكنت مبسوط به جدا وليس لوجود به النادي الأهلي ولكن الفيلم دراميا فعلا محتاج النادي الأهلي والسيناريو نفسه قوي جدا وده اللي خلاني مترددش ولو للحظه والحمد لله انه وقع هذا الفيلم في يدي .
5) أحكيلي عن كل أعمالك الفنيه
فيلم 7 ورقا كوتشينه كان أول مره امثل وكان تعارف بالنسبه ليه وكان الدور كبير جدا وغني جدا وأداني الفرصه ان اطلع جزء من اللي عندي وانا حتي الآن أدين لدكتور شريف صبري بهذا الفضل ومكنش الحقيقه دور سهل وكان شخصيه مختلفه عني تماما وجعلني أترشح لأفلام ثانيه . اما تاني فيلم فكان فيلم فتح عنيك وده فيلم بحبه جدا جدا وأول حاجه كم الممثلين الموجود به أداني الفرصه ان ناس كتير تشوفه وكنت بعمله وأنا حبه ومثلت به شخصيه الظابط ومثلت الفيلم وانا حبه جدا زي فيلم العالمي حاليا وبعد ذلك فيلم أخر الدنيا وكان به مغامره شديده جدا بعد نجاح فيلم فتح عنيك وكان مع نفس المنتجه مي مسحال وكان مخاطره شديده جدا ومن أكثر التجارب اللي استفدت منها وكان الفيلم ده كان في حاجه غريبه ان لازم الناس متصدقنيش لحد أخر ربع ساعه في الفيلم وده كان صعب جدا وبعدها شاركت في فيلم هي فوضي مقدرش أقول أنه البدايه عشان مغفلش كل اللي قبله ولكنه كان محطه مهمه جدا وكان دور وكيل نيابه وشغلي مع الاستاذ الكبير الراحل يوسف شاهين علمني كتير جدا وكذلك النجاح اللي حققه حطني في مكانه كويسه جدا في السينما والضرر الوحيد اللي كان منه هو اني فقدت روح المغامره وان العمل القادم لازم يكون مدروس كويس جدا . أما بالنسبه للتلفزيون عملت فيلم عميل 1001 وكان مع مصطفي شعبان ونيللي كريم واتعرض في رمضان ومن بعدها مسلسل علي نار هاديه والسيندرلا واستمتعت جدا جدا بدور الاستاذ الكبير علي بدرخان والخبر الجديد ان شاء الله بعد فيلم العالمي عندي مسلسل هعمله انا وزينه في رمضان القادم اسمه ليالي وان شاء الله يعجب الناس .
6) مًن من الممثلين نفسك تشتغل معاهم ؟
ناس كتير عادل أمام وعمر الشريف وكان من أحلامي والحمد لله اشتغلت معاه الفنان الراحل أحمد زكي وبصراحه أي حد اشتغل معاه وهيفدني فأنا نفسي أشتغل معاه مش شرط حد كبير او صغير .
7) بعيدا عن الفن والرياضه أزاي يوسف الشريف بيقضي يومه العادي ؟
انا بروح الجيم كل يوم ومواظب جدا عليه والحمد لله من شهر 8 الماضي الحمد لله بقيت بصلي كل الفروض في المسجد ويومي طبيعي جدا وشخصيتي نهاريه اوي "بصحي من بدري ومش بعرف اسهر "
ما هي أطرف الاشاعات التي ترددت عنك وتعجبت منها ؟أول اشاعه كانت ظريفه جدا بالنسبه لي واتبسطت بها وكانت قالوا اني ابن الفنان عمر الشريف وكانت اشاعه عاديه لا تؤثر سلبا وبعدها كان في اشاعه سخيفه جدا جدا واكتبت في الجرايد وكان لها فعلا غرض شخصي وهي ان يوسف بيبوظ لاعبي الأهلي وزعلتني جدا جدا وهما كلهم أصحابي وكلهم ناس محترمين جدا
9) من هم أفضل الأفلام والممثلين عند يوسف الشريف ؟
بحب أفلام تيتو وملاكي اسكندريه وواحد من الناس وكده رضا أكتر فيلم بحبه جدا و أفلام الغروب وشئ من الخوف وزوجه رجل مهم والباب الحديد.
الممثلين محمود مرسي وشاديه ومحمود المليجي وأحمد عز وأحمد حلمي
10) لو أتعرض عليك تمثيل شخصيه من شخصيات فيلم كده رضا الثلاثة تختار مين ؟
اختار شخصيه البرنس وشخصيه جميله جدا وجايز أنا حبتها عشان خاطر أحمد حلمي أتقنها.
11) بعيدا عن الفن مًن من لاعبي الأهلي اصدقائك ؟
والله الحقيقه كلهم اصدقائي وأقربهم أمير عبد الحميد لآني لعبت معاه أيام الناشئين وحسين ياسر وحسام عاشور وأحمد عادل لاعب الأهلي السابق وهاني سعيد ومحمد ابو العلا وأحمد سمير فرج وسيد معوض وأحمد حسن الصقر وإبراهيم سعيد وأحمد الجمل يعني مش عايز أنسي حد بس هما كلهم فعلا اصحابي .
12) ما هي النصيحه اللي وجهها يوسف الشريف لأمير عبد الحميد قبل أول مباراة له بعد هروب الحارس السابق ؟ وبعد مباراة بتروجيت الأخيره
هي مسئوليه كبيره وطالكماا بتلعب في الاهلي فهي مسئوليه كبيره وطالع من الناشئين لان الاهلي ده كيان مش فريق كره فقط وامير جاء في وقت الدفاع لم يكن فيه في احسن الحالات وحرس المرمي في وقت الفريق به كباتن توفيق في ماتش بتروجيت والغلطات اللي غلطها كلها غلطات وارده ومش غلطات كره قدم علي اد ما هي غلطات توفيق وعدم توفيق
13)ما رأيك في مانويل جوزيه ؟
من احسن المدريبن اللي حضروا لمصر ومقدرش اعتبر نفسي خبير كروي واحكم عليه بس هو من أحسن المدربين اللي جوم في تاريخ وأشهد له بكل قوايا العقليه انه من أحسن المدربين في التاريخ واحساسي حاليا انه افتقد روح جو المغامره ودلوقتي بقي بيخاف يخسر عكس انه كان دايما بيلعب عشان يكسب بدأت أختلف معاه
14) كمشجع وعاشق للنادي الأهلي من هو اللاعب الذي تتمني انضمامه للنادي الأهلي ؟
ضاحكا فرناندو توريس وبصراحه الأهلي محتاج لعيبه بس مقدرش أقولك اسماء معينه او مركز معين عشان كلهم أصحابي .
15) من هو اللاعب والشخصيه الرياضيه اللي كنت تتمني معاصراتهم واللعب بجوارهم ؟
اللي كان نفسي اعاصره بسمع عليه حكايات هو صالح سليم واللي كان نفسي اللعب معاه محمد أبو تريكه وكان امنيه حياتي ابقي بلعب كمهاجم وورايا ابو تريكه ومن جيل القدامي علاء ميهوب وطاهر ابو زيد .
16) هل الأهلي قادر علي حسم الدوري لهذا الموسم بعد فقد عدد كبير من النقاط في أخر اربع مباريات ؟
اه ان شاء الله وانا واثق من ذلك وانا واثق جدا في الفريق ككل وجوزيه ومقدرش أقول ان بيعمل حاجه غلط بس هو ممكن يكون بيعمل حاجه أنا مش فاهمها ومقدرش اقول أننا نضمن حسم الدوري بنسبه 100% بس الأهلي قادر جدا علي حسم الدوري لمصلحته .
17) ما هي توقعاتك لتصفيات كأس العالم وكأس القارات ؟
بصراحه لو مدخلناش كاس العالم هذه المره مندخلش تصفيات كأس العالم تاني بصراحه لآنها أكتر مره ممكن نوصل فيها كأس العالم وأقرب منافسينا منتخب الجزائر وأكتر فريق بلغه " الكوره هيتعبنا " .
كأس القارات عشان نكون واقعيين مش مطلوب مننا نكسب كل الفرق ولكني أتوقع أننا سنخر من البرازيل بفارق هدف ونتعادل مع منتخب ايطاليا ونفوز علي المنتخب الأمريكي ( وده لو لعبنا بنفس المستوي اللي لعبنا به في غانا 2008 ) .
18) ما هي المباريات التي شاهدتها في التلفاز وكنت تتمني حضورها في الأستاد ؟ ومباريات لم تلعب بعد وتتمني مشاهدتها من الأستاد ؟
ماتش الأهلي والزمالك المباراة التي أنتهت بنتيجه 4/3 نهائي كأس مصر ومباراتي منتخب مصر في كأس الاممم الإفريقيه بغانا 2008 مع منتخبي الكاميرون (4/2) وكوت ديفوار (4/1)
أما مباريات اتمني أن احضرها من الاستاد كل مباريات تصفيات كأس العالم التي ستلعب في مصر وهحاول لي أد ما اقدر أن اسافر أحضر كأس القارات وخصوصا مباراه مصر والبرازيل .
19) ياتري مين اللاعب اللي الناس شبهت طريقه لعبك به ؟
ناس كتير شبهوني بمحمد فضل لاعب الإسماعيلي .
20) ما رأيك في الحمله التي تعرضت لها جماهير الكره المصريه عامه وبالأخص جماهير النادي الأهلي ؟
بصراحه جمهور الأهلي جمهور محترم جدا وطيب اوي اوي ولو اتعامل وحش مش بيحاول أن يعامل بالمثل وأعتقد ان هذه الحمله لها اغراض شخصيه .
21) تقول أيه لكل من :
جمهور الأهلي : متقلقوش وأكتر حاجه ممكن تكون سلبيه علي لاعبي الأهلي القلق الزياده والجمهور هو اللي في ايده ينقل القلق أو الثقه للاعبين وخليكم ورا حسين ياسر لآنه هيبقي اضافه قويه للنادي الأهلي وبصراحه أنا شايفه بعد كده هيكون ابو تريكه .
محبي يوسف الشريف : والله انا بقول لسه ياهادي والناس اللي حبتني وقدرتني دول والله علي راسي من فوق وجايز والطبيعي ان كل ما الواحد بيكمل كل ما المحبين له بيزيده وهيفضلوا الناس دي فوق راسي .
انا عايز اقول كلمتين مهمين جدا أولا انا بدعي كل جماهير الكره المصريه عامه وجماهير النادي الأهلي ومحبي يوسف الشريف خاصه للمشاركه في تصوير فيلمي الجديد العالمي أيام الخميس والجمعه 12/3/2009 و 13/3/2009 وان شاء الله التجمع سيكون في الساعه الخامسه مساءً خلف بانوراما أكتوبر بصلاح سالم . وثانيا انا معنديش (اكونت)علي الفيس بوك لان الموضوع ده عملي مشاكل كتير جدا
الفنان الاهلاوي يوسف الشريف
موضوع: يوسف الشريف : أنا أهلاوى وأنتظر جماهير مصر للمشاركة فى تصوير فيلم العالمى 
الأحد نوفمبر 08, 2009 2:59 pm